Reiknistofa bankanna var formlega stofnuð 23. mars 1973 af þáverandi viðskiptabönkum, þ.e. Landsbanka Íslands, Útvegsbanka Íslands, Búnaðarbanka Íslands, Iðnaðarbanka Íslands, Verzlunarbanka Íslands, Samvinnubankanum og Alþýðubankanum, auk Seðlabanka Íslands. Sparisjóðirnir komu ekki formlega að Reiknistofunni fyrr en áratug síðar.

RB tók formlega til starfa 1. október 1973, þegar forstjóri hóf störf og undirbúning  verkefna í samráði við bankana, en aðrir fyrstu starfsmenn voru ráðnir frá 1. janúar 1974,  ritari, yfirkerfisfræðingur og fimm kerfisfræðinemar, sem enga reynslu höfðu af kerfisgerð, en sumir einhverja af forritun og aðrir af bankastarfsemi.

Á þessum vef er að finna ýmis skjöl sem eru heimildir um aðdraganda RB, fyrstu ár, þroska og reynslu gegnum súrt og sætt, fram til dagsins í dag, eftir farsæla 50 ára sögu, þar sem RB hefur verið helsti máttarstólpi í íslensku fjármálakerfi.

Margt fleira má tína til, segja ítarlegar frá eða leiðrétta og eru allar slíkar ábendingar vel þegnar og hægt að koma til skila gegnum Ábendingar og skráning í vali á síðuhaus.